ДАЛЯНЬ, 2026 оны зургаадугаар сар. Монгол Улсын Ерөнхий сайд Н.Учрал тэргүүтэй төлөөлөгчид БНХАУ-ын Далянь хотноо зургаадугаар сарын 23–25-нд болсон Дэлхийн эдийн засгийн форумын “Зуны Давос” чуулганд оролцлоо.
Хүнсний тогтолцоо ба зах зээлийн инноваци
Чуулганы үеэр Ерөнхий сайд Н.Учрал “Хүнсний тогтолцоон дахь худалдаа, зах зээлийн инновацыг дэмжих нь” стратегийн хэлэлцүүлэгт оролцож, нээлтийн үг хэлэв. Хэлэлцүүлгээр хүнсний аюулгүй байдлыг хангах, хөдөө аж ахуйн бүтээгдэхүүний тогтвортой худалдааг дэмжих, хүнсний салбарт хиймэл оюун болон биотехнологийн дэвшлийг нэвтрүүлэх, түүнчлэн тулгарч буй сорилтыг даван туулахад төр, хувийн хэвшлийн хамтын ажиллагааг бэхжүүлэх асуудлыг хөндлөө.
Ерөнхий сайд хэлсэн үгэндээ Монгол Улс “Хүнсний хувьсгал” хэрэгжүүлж, хөрсний доройтолтой тэмцэн, жижиг, дунд үйлдвэрлэгчдийн зах зээлд нэвтрэх боломжийг нэмэгдүүлж, худалдаанд тулгарч буй саад бэрхшээлийг бууруулахыг зорьж байгааг тодотгов.
Мөн “Чөлөөлье” санаачилгын хүрээнд төрийн зохицуулалтын давхардал, хүнд суртлыг бууруулж, хүнс үйлдвэрлэл, боловсруулалт, логистик зэрэг салбарт хувийн хэвшлийн хөрөнгө оруулалтыг дэмжих шинэчлэл хэрэгжүүлж буйг онцлов. Түүнчлэн манай улс энэ оны наймдугаар сард Цөлжилттэй тэмцэх тухай НҮБ-ын конвенцын Талуудын XVII бага хурлыг зохион байгуулах бөгөөд оролцогчдыг Монгол Улсад зочлохыг урив.
“Эрчим хүч үгүй бол хиймэл оюун үгүй”
Ерөнхий сайд Н.Учрал “Эрчим хүч үгүй бол хиймэл оюун үгүй” сэдэвт хэлэлцүүлэгт панелистаар оролцож, хиймэл оюуны өсөн нэмэгдэж буй эрчим хүчний хэрэгцээ, аюулгүй байдал, дэд бүтцийн хөрөнгө оруулалт болон урт хугацааны хөгжлийн боломжийн талаар байр сууриа илэрхийлэв.
Тэрбээр хиймэл оюун, эрчим хүч, цахим дэд бүтцийг тусдаа салбарууд бус, нэгдсэн нэг экосистем гэж харж, уялдаа холбоотой хөгжүүлэх нь хиймэл оюуны эрин үеийн боломжийг бүрэн дүүрэн ашиглах үндэс болохыг онцоллоо.
Мөн Монгол Улсад дата төв байгуулах боломжийг нээх эрх зүйн суурийг бүрдүүлж буйг танилцуулж, технологийн компаниудыг Монгол Улсад хөрөнгө оруулахыг урьсан юм.
